كله ببلاش بقلم الشاعر رشاد الدهشورى

كله ببلاش
يلا اشتروا نفس البضاعه
اللى صنعها راح ومجاش
نفاق رياء وكمان مزايده
توصل لحد الارتعاش
الكل كابش فى الأنا
عطشان بيشرب مارتواش
والشعب عينه متتملاش
سكر وزيت لكل بيت
وكمان ياريت
دوى للصداع
ومنشطات اوحتى برشامه بتاع
خلينا نسهر للصباح
نحرس حدود المرجله
دالنفس مسدوده بسواد
وحيتنا بقيت بهدله
وبلحنا شيص ليه ما استواش
نسونا طهقوا من الغسيل
واللى اتغسل ليه مانكواش
وعيالنا فاتحين الكروش زى الكباش
خكومه نايمه فى العسل
عشاق كسل عشاق فشل
وبيفهموا يادوب طشاش
قاعدين وحارسين الشيكات
ويبيعوا ضمايرهم بكاش
يلا تعالوا للمزاد
الشر غطى البر زاد
وكأنه قطر وبالميعاد
القتل داير فى البلاد
وكأننا من قوم عاد
والقتل اصبح عا لمشاع
والظلم شاع
وسرق معاه اخر شعاع
فى مصر نوح بنى سفينه بدون شراع
بيلم فيها الطيبين
والشر اهل الشر ليهم الف قاع
اما اللى عاشقين البتاع
اللى بيبيعوا البلاد وبيهربوا زى الضباع
وبشعلوا نار الصراع
ويوصفونا بالرعاع
بنقول لهم مصر العظيمه لن تباع
ومسيركوا يوم راح ترجعوا
وتتقطعوا ..ويبقى ينفعكوا لبتاع